مدارات الثقافية مجلة مجكمة شهرية
مقالات مشابهة
قالو ليا انساك
آح آميمتي هاد لكلمة شحال صعبة
واخا ميات مالح ومالح
شكون ينسيني فزيتون مكناس؟
شكون ينسيني فنجان بنحليمة،
الصهريج وسوار لقصبة؟
شكون ينسيني فالدار لكبيرة،
لالة عودة، الدريبة ولعقبة؟
شكون ينسيني فسيدي عمرو،
و قبة السوق، و دار الدباغ،بونواقس
ومشاشو، ووجوه الرحبة؟
شكون ينسيني فمول لخلالة، سيدي
قدور العلمي مول القبة؟
شكون ينسيني فالسكاكين، والروى
مزيل، وجناح لمان، وليالي رمضان
فالجامع لكبير الطاهر العتبة؟
شكون ينسيني فبابا مول الكربة؟
شكون ينسيني فتحياح الشناقة،
غبار الميلود، شعايلة، وكشاكش عيساوة
الشيخ الكامل، وصهد الجدبة؟
واش شي حد ينسى لحنينة
اللي رارات به سنين وداواتو
من ألف ندبة وندبة؟
واش شي حد ينسى البزولة
اللي تقوت منها عوام؟
صابر واخا الهم كواني
وسرا بيا لعضم
حتى وصل شك الركبة
مخبوط أناري بمزود ماضي
وحاس مزيان آخويي بالضربة.
انساك.. آح أميمتي هاد لكلمة شحال صعبة
واخا مشيت بحالي،أولا بيني وبينهوم
سيد لبحر
ما حرقت مركب بحال طارق المغدور
اللي ماليه قبر
ما حاربت طواحن لهوا بحال
دون كيشوط المهبول
اللي حاسب روحو تيحارب الشر.
مانسيت الهم اللول
بقي قلبي مشغول ومهول
وشحال قدي مانحضي ونسول
اللي بان ليا بالنهار ابيض
فالليل كحال، وفالصباح أصبح ملون،
وشحال قدي ما نحضي ونسول؟
ما عليكش يا نسر مكناس..
ما عليكش يا نسر مكناس..
هي غارقة فلغيس، ونقولو قمر مكحل
هي وجهها مكمش، ونقولو دمها
على خدها كيف اللول
هي حوله عمشة، ونقولو عيونها تهبل
هي مخلخلة مدخولة،
ونقولو هي مت لعقل.
واييه أمولاي.. واييه أمولاي
شحال قالو عليا وعليك
راه هاداك غير بوهالي
الساعة راك عايق وفايق
وحاضي قنافد الليل بحالي
ما عليهش يا نسر مكناس
ما عليهش يا نسر مكناس
حنا غير شوعارا، وهوما نفارا
حنا غير عطارا، وهوما جزارا
خليهوم فوادهوم،
وحنا حبة من سبولة طايحة تشبعنا
وقطيرة من جنب الواد تروينا
ونديرو ماتيدير النحل
نحولو الزهرة شهدا
ونولدو لكلام لمعسل
شاعر وقاص من بلد الوليد – إسبانيا
