مدارات الثقافية مجلة محكمة شهرية تعني بالشأن الثقافي
مقالات مشابهة
مقاطع من قصيدة: يِمْكَنْ
عبدو سلطان گاسمي*
يِمْكَنْ… !
أَنَا مَا هُوَّاشْ
وْيِمْكَنْ…
الْحَالْ اللِّي فِيَّا مَا هَنَّانِي ،
لَكِنْ…
مَلِّي جِيتْ نْشُوفْ
لْقِيتْنِي مَاشِي اللّوَّلْ
ؤُمَاشِي الثَّانِي ؛
لْقِيتْ…
شَلَّا نَاسْ تْعَانِي
مَنّْهُمْ كْبَارْ… وَصْغَارْ…
وْمَنّْهُمْ حَتَّى گْرَانِي ،
مَا دَايْرِينْهَاشْ اهْبَلْ تَرْبَحْ
مَا دَايْرِينْهَاشْ بَلْعَانِي ؛
يِمْكَنْ…
بْغَاوْ فِينَا الْخَدْمَة
وْكَيَّلْنَاهْ فْ الدّْگِيگْ احْفَانِي ،
يِمْكَنْ…
تْخَطِّينَاهْ فَ الشَّانْطِي
وَرْبِيعْ الجّْرَادِي ،
وْيِمْكَنْ…
عَجْنُوهْ فْ مَعْدَنْ اللّْوَانِي ؛
ؤُمَنْ گَالْ دِيَارْ
لَاحُوهْ فَ الْوَدْيَانْ
وَشْرَبْنَاهْ أَتَايْ فَ الصّْوَانِي ؟ ،
وَعْلَاشْ مَايْكُونْشْ تْبَارِيدْ
دَازْ فَ خْيُوطْ الضَّوْ يَا مَگْوَانِي ؟ ؛
أَنَا غِيرْ گُلْتْ ،
يِمْكَنْ…
لْعَبْ بِيَا شِيطَانِي ،
يِمْكَنْ تْكُونْ حَقِيقَة ،
وْيِمْكَنْ وَسْوَاسْ
وَسْوَسْ لِيَا فَ وْدَانِي ؛
يِمْكَنْ…
نِفَاقْهُمْ اطْلَامِيسْ
غَمَّضْ الشُّوفَة فَ احْلَامِي ،
يمكن…
كْلَامْهُمْ بْخُورْ
هَمَّدْ السّْوَاكَنْ
اللِّي سَاكْنَانِي ،
ويمكن…
كْذُوبْهُمْ دَفَّگْنِي
فْ وَادْ لَمْرَارْ وَدَّانِي ؛
سَوَّلْتْ الشَّرّْ عَلَى شَرّْهُمْ ،
گَالْ-لِي شَرّْهُمْ
فَاتْنِي وَتْحَدَّانِي ،
فَاتْ الْمَدَى…
تْعَدَّى الَقْيَاسْ…
ؤُشِيطَانُو اغْلَبْ شِيطَانِي ؛
من ديوان (جناح الليل)
شاعر وزجال من المغرب
