مدارات الثقافية مجلة محكمة شهرية تعني بالشأن الثقافي
مقالات مشابهة
لقصيدة بعنوان: آشْ دْهَاكْ يَا عَقْلِي؟
عبدو سلطان گاسمي*
وَانَا تَايِهْ…
تَايِهْ فَ سْكَاتِي
كِ الْمَخْبُولْ نَمْشِي وَنْجِي ،
وَحْدَانِي فَ اشْوَاقْ امْعَرّْيَة
كُلّْ يُومْ تَرْمِينِي لْجِيهْ ،
انْدَارِي بْكَايَا وَنْوَاسِي
وَجْرَاحْ قَاسِيَة
شَاعْلَة فِيهَا النَّارْ ؛
انْسَاعَفْ صَبْرِي
الْوَقْتْ مَا نْصَفْنِي ،
شَلَّا احْفَارِي مَنْصُوبَة
وْشَلَّا اعْوَارَضْ لَاقِيَانِي ،
امْعَتّْرَة الْخَطْوَة
فَ طْرِيقْ الْآمَالْ ،
وَبْقِيتْ مَجْلِي فَ السَّهْوَة
خَلَّاتْنِي مَحْتَارْ ؛
مَشَاعِرْ امْخَلّْطَة
تْهَزّْ الْكَيْنُونَة
تَسْرَحْ بِيَّا فَ الْآفَاقْ ،
نْعُودْ امْخَلْوِي
نَحْسَبْ حْسَابْ
لْكُلّْ شُوفَة ،
وَخْيَالْ مَشْكَاكْ
ايْحَاجِي لَفْكَارْ ؛
أَنَا شَمْعَة ضَاوْيَة
طْفَاتْهَا رِيَاحْ الْحَظّْ ،
دَمْعَة وَافِيَة
نَازْلَة بَالْعَرْضْ ،
أَنَا الْغَابَرْ الْمَفْقُودْ
انْقَلَّبْ اعْلِيَّا فَ احْشَايَا ،
وَانَا اللِّي كُنْتْ…
نَبْتَة يَافْعَة
وْغَطَّاتْهَا لَحْجَارْ ؛
يَا أَنَايَا…!
أَنَا هْنَايَا
غَابْ اهْنَايَا ،
فَذَّانْ الْوَرْدْ
اكْرَمْ وَدْبَالْ ،
وْعَزّْ الْمَكْتَابْ
امْحِيتِي عُنْوَانُو
طْوِيتِي صَفْحَاتُو
ادْفَنْتِيهْ وْرَا(ء) لَسْوَارْ ؛
فَ دْوَاخْلِي بُرْكَانْ
اعْوَافِي بْلَا دُخَّانْ ،
نَوَوِي بْلَا رَاسْ
افْرَادَة بْلَا قَرْطَاسْ ،
وَانَا اللِّي حَاسّْ بِيَّا
مَنْ غِيرِي شْكُونْ يِحَسّْ ؟
وَشْكُونْ مَنْ غِيرِي
يَمْحِي لْآتَار ؟ ؛
يْزُورْنِي السُّؤَالْ فَ الظَّلْمَة
كِيفْ الْحَمٌَّى الْبَارْدَة ،
وَشْحَالْْ مَنْ حَلْمَة
سَرْقَاتْنِي مَنِّي
وْسَرْقَاتْ نْعَاسِي مُدَّة ،
اضْحِيتْ الْيُومَا
صُورَة بْلَا تَعْبِيرْ
وَمْرَايْتِي بَعْدْ صْفَاهَا
بَعْدْ صْفَاهَا…
اجْلَاهَا التَّكْسَارْ ؛
آشْ دْهَاكْ…
آشْ دْهَاكْ يَا عَقْلِي ؟
اصْبَحْتِي فَ الْوْهَامْ عَوَّامْ ،
امْعَلِّي بَجْنَاحْ الرِّيحْ
امْخَلِّي مْدَادِي كَيْسِيحْ ،
وَلِّيتِي امْكَثَّفْ
وَلْسَانَكْ مَرْبُوطْ ،
عَادْ لِيلِي مَخْمُورْ
وَنْهَارِي…
وَنْهَارِي يِشْرَبْ لَمْرَارْ ؛
انْظَرْ لْحَالَكْ…
انْظَرْ لْحَالَكْ يَا حَالِي
وْشُوفْ عَيْنْ الزُّوبِيَة
لِينْ وَصْلَتْ بِيَّا ،
الشَّطْنَة امْتِيرِيسْ
وَالضَّحْكَة وَحْدَة فَ الْمِيَة ،
نَشْكِي لَدْمُوعْ الشَّمْسْ
وَالْقَلْبْ وَرْدَة مَجْرُوحَة ،
تُرْبَة شْرِيفَة
زَرْعُو فِيهَا لَغْيَارْ ؛
سَارَحْ فْ هَمِّي
مَجْلِي بْتَخْمَامِي ،
وْعَادَتْ اشْوَاقِي
ثَايْرَة وَسْطْ اخْلَاقِي ،
النِّيَة عَفَّة
سَكْنَتْ الْعَارْ ،
حَتَّى الَوْفَا(ء)
زَادْ خَلْفَة
اعْطَى بَالظّْهَرْ
اعْطَى بَالظّْهَرْ وَلَّا غَدَّارْ .
شاعر من المغرب
