مدارات الثقافية مجلة محكمة شهرية تعني بالشأن الثقافي
مقالات مشابهة
…
الما(ء)
غْسل الساقية نقاها
غْسل قلب الرمان
ب حلاوة تعمَّر الاكنان
تبدلات حروف الجنان
الما(ء)
قبّل عريشة وزيانْ
غارت الساقية
الواد تلف الميزان
جا على الأخضر واليابس
من العشق
شحال جيعان
…
الما(ء)
كاع الكيسان تفرح به
تعنقو حتى ف الاحزان
الما(ء)
نيشان
معروف الصدق عليه
صاحب النفع
عند الحزة ما تفرط فيه
الما(ء)
سقسي رمال الصحرا(ء) عليه
داك النخل لمجرَّد
والعين الشَّادة عليه
…
الما(ء)
رطّب قلب العجينة
سْخية
يتيمة ف يدين حنينة .. نقيّة
موالف الخاطر
كيف ريحة طيابو تجينا
الما(ء) رجعنا لمالينا
فاض الوحش بنا
شحال تمنينا
الله يَخْليك يا لجفا
انت اللي غرَّرْت بنا
نسينا
ب اللي اليد
اللِّي ترشك ب الما(ء) حنينة
…
الما(ء)
وانت كيف كيف
انت حياتي
هو حياة
انت العمر
هو وليف
انت سري
هو معروف
…
الما(ء)
شاد الواد من يدِّيه
يجري به
من حر السما(ء)
اللي كبَّات همها عليه
جرحها الرعد
ب دمها
حالفة حتى تسقيه
…
الما(ء)
حياة ف صدر الكون
تجري ف سواقيه
عاشقاه لعيون
داك الجبل فتح قلبو ليه
يتبسم الكون
تفرح ماليه
…
الما(ء)
جا لحرفي يسقيه
يمكن تزغرت المعاني
تكشف على وجه الزين فيه
تحييه
مراسم البوح كاملة تنشد به
…
الما(ء)
مساعف الواد في هبالو
شحال من شعبة تعشق فيه
الواد كِي يجعر
يغدر ب ماليه
شطب الرطب
الحرشة تتحكك عليه
واخا الما(ء) روح صافية
الواد ك يخلوض فيه
زجال من المغرب
