مدارات الثقافية مجلة محكمة شهرية تعني بالشأن الثقافي
مقالات مشابهة
قصيدة رمضان
نظم أيوب گلدي
في بحر المشتب
عن قياس «أعاشق صون هواك»
لسيدي قدور العلمي رحمه الله
الحربة
هْلّْ آسِيدِي رْمْضَانْ وْ هْلاَلُو
بْسْمَة مْنَوّْرَة فْ سْمَاهَا تْسْقِي الرُّوحْ
بْالرَّحْمَة وْ الْغُفْرَانْ
القسم الأول
آسيدنا
هْزّْ كْنَانِي سْلْطَانْ تْهْلاَلُو
شَهْرْ الصّْيَامْ هْيَّجْ حَالِي
بْالْفَرْحْ وْ السّْرُورْ زْهَى لِي
وْحْكِيتْ مْنْ صْمِيمْ دْخَالِي
هُوَّ صْلاَحْ بَالِي
هُوَّ فَالِي دْوَى عْلاَلِي
يْشْفِي الاْبْدَانْ
وَانَا غَايْبْ نْشْوَانْ لُوصَالُو
رَاحِي وْ رَاحْتِي وْ مْرَاحِي نُورُو يْلُوحْ
مْنْ فُوقْ السَّبْعْ مْتَانْ
القسم الثاني
آسيدنا
حْطّْ زْمَانْ الْغُفْرَانْ ارْحَالُو
وَقْتْ الاْسْحَارْ صُوتُو صَايْلْ
فُوقْ الاْفْلاَكْ سَارْحْ وَاصْلْ
هْلاَّلْ بْالْهْلاَلَة هَايْلْ
اَلْقَلْبْ لِهْ مَايْلْ
ذَايْبْ سَايْلْ بْلاَ مْشَاعْلْ
فْجَّرْ لْعْيَانْ
طِيبْ طْيَابْ الْجِنَانْ مِيجَالُو
وَقْتْ الرّْوَاحْ ثْمْرَة فْ الْحَلْقْ تْجِي دُّوحْ
تْرْعَشْ لِهَا الاْبْدَانْ
القسم الثالث
آسيدنا
شَهْرْ الرَّحْمَة فِيحَانْ بْفْضَالُو
بْتْرَاوْحْ اَلْمْسَا نَتْجْلَّى
نْعْرَجْ فْ السّْمَا بْالْمَهْلَة
لْرْكُوعْ بْالرّْفُوعْ وُ لْعْلاَ
صُومْ وُ قْيَامْ يْحْلاَ
وْجْهِي قْبْلَة بْالْمْذَلَّة
طَالْبْ غْفْرَانْ
قْلْبَنْ يْذْكَرْ وْ لْسَانْ يْصْغَى لُو
نْبْضَة فْ رُوحْ كُلَّ نْبْضَة عْنِّي تْبُوحْ
عْبْدَنْ يْرْجَى خُوفَانْ
القسم الرابع
آسيدنا
جَا مْنْ بِهْ الْقُرْآنْ تْنْزَالُو
لِيلَة مْبَارْكَة فْ لْيَالُو
الرُّوحْ وْ الْمْلاَيْكْ جَالُو
وْ سْمَا بْأَلْفْ عْدّْ مْثَالُو
سْعْدَاتْ مْنْ وْفَى لُو
لُو آجَلُو جْنَى حْلاَلُو
ثْقَّلْ لُوزَانْ
يَا مْنْ سَاهِي غْبْطَانْ فْ زْلاَلُو
لله قُومْ تْغْنَمْ فْحْيَاتْكْ لاَ تْرُوحْ
مْتْمَادِي فْ الْخُسْرَانْ
القسم الخامس
آسيدنا
مَسْكْ رْحِيقْ الرِّيحَانْ شْوَّالُو
سْتَّة رْكَانْ شْهْدَة بْعْسَلْ
تْرْيَاقْ عَامْ جَبْحْ مْثْقَّلْ
ذْلّْ السّْبِيلْ لْلِّي يْسْأَلْ
وْ خْتَامْ مَا نْفْصَّلْ
أْيُّوبْ عْمَلْ فْنّْ وْ شْغَلْ
سُوسِي لُوطَانْ
وْصْلاَةْ عْلَ الْعْدْنَانْ وُ آلُو
عْدَادْ مَا مْسْطَّرْ بْالْقَلْمْ عْلَى اللُّوحْ
حَفْظْ مْكْوَّنْ الاْكْوَانْ
