مدارات الثقافية مجلة محكمة شهرية تعني بالشأن الثقافي
مقالات مشابهة
حلمة بنت النهار..
يوسف أسكور*
هذا مشهد من حلمة بنت النهار ، ماشي زجل حينت هو واقع ، كتعيشو الكتبة كل ما حرتت جناب الورقة وهزت ايديها للسما تطلب المداد يطيح..
ايوا
غمضي ولا غمض عينيك واقرا
صعيبة ياك ؟
وانا مكمش ك تيلاد ف كرش الضلمة…
سمعت
غوتة
طاحت فِ ودني بحال السكات
هرست اخيالها.. واصداعو فيَّق السطر لِ لّْوحان النقطة
جاية قاصداني والمقصود سلامي
مادة إيد فاسخة الحنة والمحنَّة
ولابسة قميص مطروز بناب اصفر
تابعة لاطرها المشيّْط الدم
تندب ف لفراق وتگول…
البركة ف راسك
الله يجعل محبتك اصبر
الله يجعل محبتك اصبر ..
تگول وتعاود ليها الله ياربي الله لمن خلا راسو وحريفاتو باقين اصغار امساكن .
ومرة مرة كَ تطّل على دموعها واش مازال مشعبطين ف اهداب الشك.. على وجه مراية لابسة كادر ابيض
عاكسة شلا وجوه ،
ماعْرَفْتْ فيهم غير المجدامة ايدي وضل كانت حاسبو ..انا فولة وهو نصي المقسوم
ضهر ليا العجب وكتفتني الدهشة
رميت عليهم عار لفهامة ، ناوي نفسر هد لمنامة ونخرج من بين رجلين لكتاب بنادم جديد ، نحضر معاهم للراسي وقت الدفين ونرّد عليَّا التراب ،
مابغاوش يسمعوني ، لقاوها احسيفة ووجيبة محال تعاودها الكتبة
وبدا الغوت
واحد گال
ارو الورقة التالية الشاهدة عل لقصيدة ديروها ليه اكفن
سول لاخر…
وماغنغسلوهش وانْوَضّوه من دنوب لقراية ؟؟
ولاخر گال
والميسان ؟؟
جاوبو لاخر
نديرو قلم حدا قلم ونتهناو منهم بجوج
والقبر ؟؟
جا الجواب مني .. دفنوني ف خاطري والشاهد يكون عنوان مقجوج زردة للدود ، صلو عليا بالاشارة ، اقراو عليا فتية بنت لساني ،رشو على قبري ضحكة يتيمة وفَرّْقو عل الصبيان حسنة زرعتها ف فدان لخاوة هدا شحال
دارو بالوصية ورجعو دخلو ف لمراية بعد ما فسخت لبيض وتعلقت على حايط مشقوق لقيت راسي غا وحدي داوي ؤ مازال حي
مامتش
غ سهيت
ولا واقيلا مشيت نراجع اسواري.
شاعر من المغرب
