مدارات الثقافية مجلة محكمة شهرية تعني بالشأن الثقافي
مقالات مشابهة
باسم الله وعليه نعول باش يسهّل فلساني لَنْظام
من هذا المنبر بغيت نعبر ونوصل صوتي لجميع لقوام
ونفاجي على نفسي لعليلة ومن حلمي نبني أحلام
ياك ما نفْرَح ونْفَرَّح وِبان الضو بعد الظلام
بعدما قاسينا، منا، وبنا حيت تقاعسنا سنين وعوام من هذا المنبر بغيت نعبر
لكن تخلط لكلام بكلام نشفات محابر وجفت اقلام
حفات سيوفنا وصدات وزلات بنا قدام وقدام
خلينا منسجنا واݣف واتبعنا طريق الاوهام
مشطنا ما ابقى يعزل والمغزل اصْبح من ليتام
ما بقات الخلَّالة تدق والقرشال تقاعد بالتمام
والمناول ما بقات تحاول باش تصون ليها مقام
تخبل السّْدا، فرحات لعدا ولا شي يبشر بسلام
تخلط فْدِّينا الحابل بالنابل وتْلفْ لينا النزق وهام
ما تلقى خيط سدا مسݣم ولا جرَّاي ساير الݣدام
صبحات اليوم النيرة فحيرة كبيرة، ما نفع فيها تخمام
مسكين النساج ولى محتاج والناعورة تصابت بسقام
راحنا مسخنا واتْسخسخنا عيينا واعيات بنا ليام
راحنا عيينا وعيات بنا ليام
غادي ننصح نفسي ونصحك إلى تنفع فينا نصيحة
دغْيَا راجع نفسك وامسح الْواح الذل والفضيحة
سدِّي من ثاني وجديد وابْدا شي بدية صحيحة
صفف خيوط منسجك واكتب بلغة فصيحة
سيناريو على قد جهدك ودير مسرحية مليحة
إلى نجحت تكبر فْرحْتك وتشوف الدنيا فسيحة
ويصبح من حقك تطلق ألف صيحة وصيحة
وترفع راسك أخويا وتوقف ولو بعد ميتين طيحة
ويلى فشلت…
إلى فشلت …
إلى فشلت يصبح من حقك تݣول:
شهدوا راني درت جهدي، درت كل ما عْليَّ
ديروا بحالي! يمكن تفوزوا، وتديروا لنا مزية
زجال من المغرب
